أيام الإضراب - 1

النهاردة أول يوم إضراب جزئي ليا. المفروض مُضربة عشان محمد سلطان يطلع من الحبس، أو كنوع من المؤازرة المعنوية، أحس بألمهم يعني واختبر إرادتي، ح استحمل زي ما هم مستحملين ولا لأ.

كنت صايمة، صحيت على الضهر متضايقة جدًا كالعادة، دي حاجة ملهاش علاقة بالإضراب ولا أي حاجة، أنا باصحى مؤخرًا من ساعة ما جيت السعودية وأنا متضايقة جدًا.

المهم، قمت وفتحت كتاب "طعام صلاة حب" لإليزابيث جيلبرت وقريت شوية. بتقول كلام حلو. فتحت الفيس بوك بعدها والإنترنت فضل يلعب معايا لعبة "الآن تراه، الآن لا تراه" وريفريش طول الوقت. قعدت اتكلم مع مسؤول الإضراب وقال لي آخد قياساتالضغط والسكر.

رحت على العصر أخدت القياسات، لقيتها 110/70 والسكّر 79 والطبيعي بتاعه 80. يعني مش قليل أوي، وده قبل طبعًا ما يقولوا لي إني لازم أخدها على آخر يوم الإضراب يعني على بالليل -_-

المهم، جه الفِطار وفطرت عصير تفاح ومية مش ساقعة، بيقولوا في ويكي هاو المية متبقاش ساقعة، طيب يا عم متزقش. فضلت أشرب شوية وأنا نفسي جدًا آكل. جات لي بنت الجيران قعدت تاكل وداني برغيها - 8 سنين - ولوّنت وعملت لها ساندوتش مربى كان نفسي فيه جدًا جدًا بس قعدت أقول اللهم "اغزيك" يا شطان.

مشيت البنت بعد ما أخوها كمان جِه وأنا مشيتهم بالأمر كده. مش فاتحاها داي كير هيا >_<

جه بالليل وقعدت اقول لنفسي المهم هو التخلّي، لأني لقيت إني باوعد نفسي: لما افكّ الإضراب ح آكل كذا وكذا ومش ح ابطّل. لأ، مش ده الدرس المفروض آخده، المفروض أقول لنفسي عن التخلّي، وأقول لها كمان إن مش مهم الأكل المهم ننفذ إرادتنا.

أنا معرفش الإضراب ح يستمر لفترة أد ايه، بس آديني باختبر نفسي وأشوف، والله المستعان.

ياللا ربنا معانا، معلش صدّعت دماغكم بحاجات يمكن ملهاش لازمة، بس رجوعي للتدوين هنا بيحمّسني إني أمشي في مشوار الإضراب. ربنا معانا :)