صحيت متضايقة جدًا، كالعادة. رحت نمت تاني، وصحيت متضايقة أكتر إني مش ح آكل. كان نفسي آكل جدًا، وحسيت بكآبة كده، خصوصا لما طلعت الصالة ولقيت الفطير على السفرة والجبنة في التلاجة. ماما كانت صاحية وما اتكلمتش معاها.
أنا بيضايقني جدًا قعدتي مع ماما بدون كلام، يعني ما بنتكلمش، مفيش مواضيع مشتركة ، واللي هاممني بخاف أقولهولها لتضايقني. هي كمان، بتضايق من تريقتي عليها، أنا بحاول أبطل مضايقة مش عارفة.
جيت على نصّ النهار كده مزاجي اتعدل شوية، والجوع خفّ. قلت افتح الكتاب اكمل شغل فيه لقيتني مزغللة ومصدعة ومش مركزة خالص. ماما كانت نازلة قلت لها تجيب لي لبن بالشوكولاتة ولبن رايب. اعتقد مش ح يضروا الإضراب، صح؟
وبعدين ماما جات وجابت لي اللبن قعدت اشرب فيه ونسيت جوعي، بس أحيانًا باقفش نفسي إيدي خلاص ح تروح ناحية الفطير أو العنب - ما هو ماما راحت السوبر ماركت وجابت عنب وكوسة وجزر وعملت خضار سوتيه وشوربة شوفان، وأكلتهم قدامي :( - اقفش نفسي أقوم متراجعة.
عمالة اتابع أخبار الإضراب وناس كتير منضمة حتى لو ليومين أو تلاتة، اسمنا بنحارب في "معركة الأمعاء الخاوية". كتبت مقالة بانجليزية كسيحة وبعتها لصاحبتي نيفين تحررها لي من الأخطاء اللغوية والتحريرية، كتّر خيرها والله عملت حاجات حلوة جدًا مكنتش ح آخد بالي منها. بعته لكذا مكان، الصراحة اللي اعرفهم قليلين يعني. بس يارب يتنشر نكون عملت حاجة.
بيقولوا لي دلوأتي أفك الإضراب عشان لو حدّ عرف وأنا في بلد تكره التعبير عن الرأي ومفيهاش دستور أساسا، ممكن اتأذي. أنا بقول أكمل كمان يومين أشوف نفسي عاملة ايه، ربنا يسهل يعني.
بس وح ادخل أنام.
جوايا شعور إني عايزة أدي أكتر، عايزة أعمل أكتر من اللي باعمله ده، نفسي اتنطط واقف على إيديا واترجم واشتغل وكل حاجة. بس ربنا يسهل بقا..
تصبحوا على خير :)
No comments:
Post a Comment