حبة حاجات تعملهم/متعملهمش مع عيالك، الله لا يسيئك!

الكلام بعضه خارج شوية، اللي بيتكسف يعمل من بنها!

1- أولاً والأكثر أهمية على الإطلاق: إوعى تضربهم، لا ضرب خفيف ولا تقيل، مش بالكيلو هوّ! زنانين مبيسمعوش الكلام بيعملوا دوشة وإنت نايم مطلعين ميتينك فيه طرق تانية يا بابا تقوّم سلوكهم بيها، فيه منع مصروف أو منع اللعبة المفضلة أو الخروج أو إنك تديله وش خشب متكلموش لمدة يومين مثلاً، فيه إنك تقعده على كرسي في الركن وتقول له فكّر في اللي إنت عملته كان صح ولا لأ، طبعًا باتكلم على عيال بتعقل شوية، يعني من 8 وطالع.. الأصغر من كده الوش الخشب نافع معاه، او أي طريقة تانية. تخيّل كده إنك طفل صغير عنده سنتين مثلا، وشقي زي الشياطين المش متسلسلة، بس كل اللي تعرفه في الدنيا هو أبوك وامك، مصدر الأمان والحنان والأكل والشرب والحب والشقاوة والدلع، وفجأة يضربوك جامد ويبرقوا لك ويزعقوا للي خلّفوك! ساعتها إحساسك ح يكون عامل ازاي يا فالح؟ لو معرفتش توصل للإحساس ده يبقى إنت مبتحسش، يفضّل متخلفش أساسا، عشان متطلعش عيال مشوّهين نفسيًا، وتطلع قسمتهم بقا إنهم يحكموا البلد.. كفاية عاهات!!

 

2- آخرك في تقويم السلوك والتنبيه على الصح والغلط والتحكم في التصرفات 21 سنة، بعدها ده راشد كبير عاقل مسؤول عن تصرفاته.. إذا كان ربنا ح يحاسبه لوحده من أول ما يبلغ كمان مش من أول 21، مال أمك إنتا؟ إنت تديله حدود: يخرج وييجي في حدود كذا، ميروحش الحتة الفلانية، يسأل على قرايبه، يجيب الطلبات وهو جاي، يشتغل كويس/يدرس كويس، وبعدها اطلق له الحبل على الغارب.. الأمر ده مهم جدًا لأنك بتعلمه ياخد مسؤولية نفسه، تعلمه إنه هو المرجع مش إنتا، فبالتالي يقدر يعتمد على نفسه وبس. الفعل ده خطأ ليه؟ عشان هو خطأ في ذاته مش عشان بابا/ماما ح يزعقوا لي. فهمت يا حلو؟ 

 

3- الحيوار.. تتكلم معاهم في كل حاجة، تتكلم مش تشخط! مش تدي أوامر، مش تزعق.. إنت مش ربهم الأعلى، يعني الكلام بالهداوة وبالراحة، بقدر الإمكان. متستخدمش كلامهم ضدهم أبدًا، يعني مثلاً هو قال لك بابا أنا فيه بنت يمكن أكون معجب بيها، مش عارف. متجيش بعد كده بسلامة اللي خلفوك تشهّر بيه في خناقة ولا حاجة، وتقول له كلام من نوعية: داير على حلّ شعرك مع البنات وتقول لي معجب بيها ولا معرف ايه! تلاقيك بتخرج معاها يا (****) من ورانا ومش قايل لنا! إلخ إلخ إلخ.. بص ده يا برنس ح ينزلّك من عينيه هوا، في لمح البصر، ومش ح يقول لك على حاجة تاني.. تخيّل بقا مدى ارتفاع وسُمك الحاجز اللي بينكو بالمنظر ده.. الأمر ده ممكن ميكونش مؤلم بالنسبة لك، لكن تخيّل وإنت في أرذل العمر وقاعد معاه مبتعملش حاجة  ومضطر تكلمه، وبينكم حاجز أساسا، يبقى مش ح تتكلموا.. ح تحس بالوحدة قد ايه ساعتها يا حلو؟ ما هو من عمايلك السودا! اعمل لآخرتك بقا وبلاش تتنطط على ميتين الواد.. فهمت؟

 

 

4- ميتين أم السياسة، يا ريت متدخلهاش البيت من أساسه، فهمت؟ السياسة بتفرّق، مش بتجمع. السياسة للصحاب، للفيس بوك - وآه ياريت ملكش دعوة باللي خلفوه على الفيس، وياريت ميضيفكش من أساسه - السياسة للشارع للميدان للبطيخ المحمّر بقشره، إنما مش للبيت.. ياريت تسمع وتعي بدل ما تفرّق ما بينكو وبعد كده تقول يا ريتني..

 

 

5- المصروف: ما تبخلش على أمه، إديله - وإدّي أمه برضه مفيش مشكلة - اللي يكفيه وزيادة سِنّة، وعلمه يحوّش، بحيث إنه يصرف بدون ما يكون خايف إن الفلوس تخلص، يصرف في حدود المعقول، وفي نفس الوقت يكون مسؤول عن قراراته المادية، يطلع يعتمد على نفسه وراجل كده مش خيخة..

 

6- الحب مش عيب ولا حرام.. إيش فهمّك إنتا؟ آه مش عيب.. فيها ايه لما يحب بنت زميلته في المدرسة ولا الجامعة؟ ما دام إنتا مربيه صح ومعرفه حدوده والحدود اللي لازم يحترمها دينيًا وأخلاقيا - مش مجتمعيًا لأن مجتمعنا فاسد نتن عفن - ومعرفه الصح من الغلط، مال أمك يحب ولا لأ؟ ولو عايز يتجوز، إنت مالك؟ بتقفل في وشه السكك ليه؟ عندك واحد شاب مشهور مش ح اقولك اسمه لأنه ميخصكش، وهو عنده 18 سنة قال أنا لازم اتجوز وأنا عندي 20 سنة عشان الفرق بيني وبين ولادي ميبقاش كتير، 20 سنة بس.. قعد يدوّر على عروسة وأهل يقبلوه والناس بتطرده من بيتها بالشلاليت وبتقول له يا عيّل، في الآخر اتجوز واحدة أجنبية مش مصرية ومتحوّلة للإسلام - الولد كان مسلم - حديثًا، وأهلها رضيوا بيه لأنهم معندهمش العقد بتاعتنا، واتجوز فعلاً وهو عنده 20 سنة.. متقفش في وش عيالك، ولو حبّوا وهما في الثانوية وقرروا يتجوزوا جوّزهم بدل ما تعقدهم من الحب وسنينه ويقعدوا في قرابيز اللي خلفوك لحد ما يخللوا..

 

وفي الآخر أولادكم مش مِلك لكم، مش معنى إنك يا حيلتها عملت واجبك البيولوجي وكانت نتيجته عيّل إنه نازل بصك ملكية بإسمك، لازم تطلعه عوده قوي مش بيرجع لك في كل صغيرة وكبيرة لحد ما بقى خيخة.. فهمت؟ إديله مساحته من الحرية، مش تبكّت عليه وعلى اللي خلفوه..

....النوت قابلة للزيادة لو لقيت كلام تاني أكتبه 

 

...............

ملحوظة على الهامش: متتجوزش لأن المجتمع وامك بيزنوا عليك عشان "تتجوز وتستقر"، اتجوز لأنك إنتا عايز كده، ومتخلفش عشان كل الناس أول ما بيتجوزوا بيخلفوا، لأ، خلّف لما تكون مستعد لكده، وأول ما تحملي/مراتك تحمل اشتروا كتب عن تربية الأطفال، عن التعامل مع الأطفال، عن صحة الحوامل، عن صحة الأطفال، عن رعاية الأزواج/الزوجات أثناء فترة الحمل، إلخ.. بلاش أبو الجهل المسيطر على الأدمغة ده!

_________________________

نُشرت على الفيس بوك

18 يوليو 2013