ده إحنا قلوب مشتاقة

"إنت الملايكة باستك".. الجملة الأكثر.. امم.. هي تتقال مع ابتسامة واسعة ونية صافية وقلب محب.. حقيقة، وقفت تقولها وهي مش متأكدة تمامًا من رد الفعل.. شاورت على خده من هنا ومن هنا وقالت له: إنت فاكر النغزات دي طبيعية كده؟ لأ، ده إنت لما اتولدت، والملايكة عرفت إن ربنا بيحبك أوي، راحت باستك، من هنا ومن هنا، وضحكت لك أوي.. تلاقيك معيطتش لما اتولدت، صح؟ أكيد ده حصل، شوف، أصل مش ممكن*، مش ممكن شفت الملايكة وتعيط، أصلها طيبة أوي وجميلة برضه، رغم إن ليها جناحات كتيرة أوي..

وهو مش عارف يقول لها ايه، أصل ايه؟ إنتي بتعاكسيني يعني؟ طيب عايزة ايه؟

أنا مش عايزة حاجة! بتفكر جوه نفسها وعلى وشها نظرة تعسة، أنا مش عايزة حاجة خالص، أنا بس شفت إنك أمور جدًا وحزين جدًا، قلت انعنشك! إزاي حد تكون الملايكة باسته، حتى لو من عشرميت سنة، ويزعل؟

طب إنت عارف إن الملايكة بتبوسنا وإحنا نايمين؟ في نفس المكان كل يوم، عشان كده النغز بتفضل، أومال إنت فاكر ايه؟ تعرف كمان إنها بتقف تحرسنا طول ما إحنا نايمين؟ أيوة، بتقف على اليمين والشمال في السرير، وبتصحيّك كمان للفجر، وللا فاكر إنك بتصحى لوحدك شطارة منك؟

الملايكة بتحب اللي يتكلم من القلب دايمًا، ولو ح يلخبط..  عشان كده - قالت له وهي بتبص له من فوق النضارة وبتحاول تبتسم - عشان كده أنا مبتكسفش منك.. إنت كمان يا عيني مبتعرفش تتكلم أوي.. هو إنت ليه مبتتكلمش عن اللي جواك؟ يعني، أنا وإنت مثلاً، مثلاً، نخرج ونتمشى كتير أوي، ونتكلم.. بس بما إني بطني واجعاني جدا ومش ح اقدر اخرج، فأنا اقترح إننا نتمشى في طرقة بيتنا.. للأسف معندناش بلكونة كنا اتمشينا فيها برضه وسقينا الزرع..  

أحكي لك حكاية؟ دي اسمها حكاية الشاي: أنا مكنتش بحبه، وبعدين صحابي بقى بيقولوا: أنا ح اعمل واحد شاي واجي لك، أعمل لك؟ وأنا مكنتش بكسفهم فكنت بقولهم ماشي.. لغاية ما حبيته. تعالى دلوأتي نبص من الشباك ولو إنه صغير ونشرب الشاي، نعناع كتير سكر كتير.. 

أنا معرفش أنا حاسة إيه ناحيتك، بس أنا بستريح لك أوي.. بحب أشوفك، بحب اقعد معاك، بيبقى نفسي جدا إني أركن إيدي على كتفك، أو ألعب في شعرك، أو اطبطب على كتفك.. أنا مش بتحرّش بيك! ولا بقتحم مساحتك الشخصية، لكن بجد نفسي أقرّب منك جدًا..  القرب محبة :)

عندي اعتراف: أنا بحب أحضن الناس كلها.. لما بشوف حد حلو أو حد يتكلم بطريقة كده لطيفة أو تلمس قلبي، بحس إني عايزة احضنه أوي واطبطب على راسه وأبوسها.. أكيد ح يبقى أفضل، صح؟

أنا نفسي حد يحضنّي جامد جدًا، واسمع دقات قلبه، واشم ريحته، ويطبطب على راسي، ويقول لي معلشي، وربنا كبير.. أنا عارفة إنه معلشي وإنه ربنا أكيد كبير، بس أحب حد يقولها لي برضه :)

إحنا غلابة على فكرة، تسعدنا كوباية الشاي لو اتحط فيها نعناع زيادة، نحب الشوكولاتة في آخر اليوم، نفرح لو جالنا لبس ملوّن على غير توقع، ونحب الطبطبة جدًا، ويا سلام بقى لو حد حضنّا.. كأننا ملكنا الدنيا بما فيها..

روح ربنا يحفظ روحك ويكرم قلبك، ويجبر بخاطرك :)

آمين

 

 

_________________________________________

"شوف، أصل مش ممكن".. من اختراع محمود عزت، طيّب الله قلبه*

 

5-4-2013