الحضن إحساس بالدفا، حد بيحتويك ويحاوط عليك يقوم مدفيك، دفا حقيقي، ودفا في القلب.. الحضن إحساس بالسَنَد، بيسند قلبك ويهدي ضرباته اللي عماله تتلاحق ورا بعضها وتجري بسرعة، ملهوفة وخايفة، يسنده إنه يقع، ويهدّيه.. الحضن احتواء، تخبية عن العالم، يحجب عنك أي شيء صعب، أي حاجة مؤلمة أو عسيرة على الحل.. بيدي إحساس بالهدوء، بإن دوشة العالم خلاص بعيدة، وإنك آمن وادع وعزيز جوه المكان ده، على الأقل لدقيقتين تلاتة.. بيشيل التقل اللي في قلبك ويزيحه شوية بشوية.. إحساس إنه "كل حاجة ح تبقى كويسة" وإنه "متقلقيش.. متخافيش، أنا هنا" اللي هو تاني أروع إحساس في الكون.. الحضن ونَس، قلبين بيتكلموا مع بعض ويشكوا لبعض، ويطمنوا بعض.. طبطبة، مع كل حطة إيد ومسحها على ضهرك بتاخد من آلامك وترميها برة، وتهدي قلقك الملتاع جوه.. بيحمي حرفيًا من السكتة القلبية، ويجيب على كل الأسئلة..
_________________________
نُشرت على الفيس بوك
30 April 2013
No comments:
Post a Comment